Edhe pse u eliminuan, Struga dhe Partizani fituan nga 1.4 milion euro
Shkruar nga Mentor Hajrizi më 31 Gusht, 2023
Struga dhe Partizani janë ndalur në fazën play-off të Ligës së Konferencës, duke mos arritur ta bëjnë hapin e fundit drejt ëndrrës së tyre të madhe.
Struga humbi në dy ndeshjet ndaj Breidablikut të Islandës, ndërsa Partizani nuk arriti ta eliminojë Astanan e Kazakistanit edhe pse në një moment ishte në baraspeshë.
Por të dyja klubet shqiptare kanë fituar nga 1 milion e 410 mijë euro nga rrugëtimi evropian.
Kampionët e Shqipërisë dhe Maqedonisë së Veriut e nisnë garën nga Liga e Kampionëve dhe më pas e vijuan në Ligën e Konferencës. Kalimi i dy raundeve në këtë garë i dërgoi deri në fazën play off, ku u eliminuan.
Katër raundet e luajtura ua sigurojnë nga 100 mijë euro për raund, pra 400 mijë euro.
Po ashtu klubet marrin nga 750 mijë euro për përfundimin e garës në play-off dhe nga 260 mijë si kampione të vendit nga vijnë.
Pra në total të dy klubet kanë arkëtuar nga 1 milion e 400 mijë euro nga garat evropiane këtë vit. /CFM/
