Vajza e heroit Afrim Bunjaku: Ikja jote babi, na la një plagë të madhe në zemrat tona
Shkruar nga Luljeta Krasniqi më 25 Shtator, 2023
Sot në mbledhjen përkujtimore në nderim të policit të rënë në detyrë, Heroit të Republikës së Kosovës, Afrim Bunjaku, ka folur dhe vajza e tij, Arbenita Bunjaku.
Ajo ka thënë se do ta përkujtojnë gjithmonë me mall dhe dhimbje, babanë, por se vendin e tij në shtëpi s’mund ta zëvendësojë askush.
Heroi im, babai im. Sa vështirë e kam të shkruaj për ty babai im. Para kohe, unë mbeta jetim, kurrë se kam besuar. Ikja jote babi, na la një plagë të madhe në zemrat tona. Babi nuk e di si do të jetoj unë pa ty. Si të jetoj unë pa heroin tim? Hyra brenda në shtëpi dhe ty nuk të pashë. Është shumë e rëndë për mua. Vendin tënd në shtëpi nuk e zëvendëson askush. Të gjitha na i mësove, por si të jetojmë pa ty, asnjëherë. Babi, ti ishe një njeri i dashur për familjen, shoqërinë ashtu edhe për punën. E flijove jetën për liri, për këtë vend që ne dhe Kosova të jemi të gjithë krenarë me ty, me heroizmin tënd, mundin dhe punën që e kë bërë për këtë vend. Të premtoj babi që do të jem gjithë krenar me ty dhe do të ndjekim gjithmonë rrugën tënde. Me mall dhe dhimbje do të përkujtojmë gjithmonë heroi im, babai im”, është shprehur ajo./CFM/
