Mentor Hajrizi – DHIMBË (1)

I.

Një dritë vezulluese,

e dalë nga ninëza e syrit,

porsi shigjetë,

i shkapërderdhet,

cep më cep, zemrës bujare.

II.

As lapsi i dashurisë,

s’mjafton,

nganjëherë,

për ta thurur gardhin e jetës,

që shpesh, sfilitës,

të sjellë të papritura.

III.

E bën më të shkurtër,

për t’u shijuar edhe më,

për ta braktisur urrejtjen,

për ta shtuar dashurinë e çiltër,

rrugën e gjatë.

IV.

Nuk është gabim të falësh,

gabim është të mos falësh,

të mos i japësh shans,

të mos i qëndrosh pranë,

të mos e çosh në vendin kyç,

në shlyerjen e njollave të zeza.

V.

Pritja më malloi,

ma lodhi ca mendjen,

më syrgjynosi pa të drejtë,

në një hendek të thellë iluzionesh.

Dromca vargjesh nga libri i Mentor Hajrizit, “Thermë e shpirtit të ndezur” (Pjesa I, Prishtinë, 2022).